Thursday, October 11, 2012

Yaheen Kaheen

Ab yahan… bayabano main
In rait kay paharon main
Azm kay devta sajay hain...
Aur azm khaak ho chukay hain!

Kahan gaye wo hum nasheen?
Kiya huay wo hum sukhan?
Teri baaton kay jo aseer thay
Poojtay thay jo tera husn

Haan yaheen… paymano main
Gardish kay mekhano main
Lahoo kay jaam dhul rahay hain...
Khuaab khoon ho chukay hain!

Jo khoj thee wo kho chali
Jo raaz thay wo reh gaye
Junoon, ghazab ko choo gaya
Aur jazbaat main yoon beh gaye


Dekho yaheen kaheen …
Hay us umeed ki lehad
Yaheen kabhi basay thay
Chahaton kay wo shehr

Yaheen kaheen gireen theen
Bay rukhi ki bijlian
Haan yaheen airiaan ragartay
Nikli thi meri jaan


Ab yahan… ujalon main
Meray cheekhtay sawalon main
Wohi arzoo basi hay
Aur ab raat ho chuki hay…

Saturday, July 14, 2012

Khuda-Kush

Teray gustaakh labon ki qasam…
In mazmoom nigahon ka bharosa tu hay
Main ghira hoon mehekti shamon kay tasawwur mein
Meray zehn ki mehboob ikhtiraa tu hay

Main raat chaandni, isi qurbat ka hoon malaal
In chamaktay sitaron say chalakhta hua sawaal
Teray wajood kay har nuqs ka main hoon musawwir
Bhagwaan hooon tera, teray jazbon ka khuda hoon

Jism tarash haathon ki qasam…
Teray seenay say ubalta hua azaab hoon main
Meri khwahish ki siyahi hay teray dard ka darmaan
Teri aarzi sochon ka inquilaab hoon main

Khoya tha in ankhon mein jo, mar chuka wo shakhs
Yeh jism, yeh azam… yeh ghazab meri jaza hay
Jo haath uthen meray iradon ko jhonknay
Unhi hathon ki lakeeron main likhi teri qaza hay

Falak-bos farishton ki qasam
Kay main gira hoon kayee pastioon say
Na kisi b’ut ko pukara, na ki bandon say iltija
Bus kia tujh ko yaad, apni gehraiyon say

Main nay apni bood-o-baash teri chah main badli
Main nay apna bharosa tujhay soonp diya tha
Bus shukr tha husti main… na inkaar, na takraar
Bay-niyaaz sawalon say, main mudhosh hua tha

Magar us muhkam yaqeen ki qasam
Main taar taar ho gaya, na huay khatm imtihaan
Khurchay gaye zakhm, nikalti thi meri jaan
Tujh ko jo kia yaad… tou hua aur bhee halkaan

Thee rooh pareshaan… tu pardon main chupa tha
Sab kuch hua barbaad… Tab tu kahan tha?
Hua khaak aik insaan… tab tu kahan tha?
Mit gayee meri pehchaan… magar tu kahan tha?

Is Bechain Arzoo ki Qasam
Meri zaat ki aandhi ki Qasam
Lafzon kay is toofan ki Qasam
Faramosh duaa’on ki Qasam…

Mein tera kuch nahi bigaar sakta… mujhay maaf kar dey…

Baat

Us nay kaha jaan hay tou jahaan hay
Main dekhta raha…
Us nay kaha raat hay tou nasha hay
Aur main kho sa gaya…
Us nay kaha fikar hay tou shukar bhee hay
Main sochta raha…
Us nay kaha dil hay tou jazbaat bhee hain
Aur main dekhta raha…

Kis bulandi say dekhta hoon main zindagi kay dhung
Kis pasti say ubharta hoon main badalon kay sung
Ik sawaal hay bay-chain sa… aur kuch teri pyaas hay
Tu he bata is bay basi ka bhala kia ilaaj hay?

Tu nay kaha insaan hay naadaan bhee tou hay
Main sochnay laga... kay main bhee insaan he tou hoon
Tu nay kaha hum duur hain aur duuriaan bhee hain
Aur main dekhnay laga… duur kaheen taaron ko

Weeraan hay, sunsaan hay, anjaan hay yay rooh
Khali hay, sawali hay… pareshaan hay yeh rooh
Kuch khaas nahee, do pal ka saath buht hay
Kia jano kal main kahan aur kahan yay raat

Tha jiska intizaar shayad… wo kaheen aas paas thaa
Aur ankhain theen kay usko bus dekh na sakeen
Tha jisko ikhtiaar… wo khaak ho gaya
Aur hawas ki aag main ik insaan jal gaya

Haan tum bhee musafir ho… haan main bhee musafir
Haan tum bhee ho tanha… na koi hay meri manzil
Na tumko hay yaqeen… aur na mujhko hay umeed
Aao qadam uthain saath… aur kho chalain kaheen

Sitaron kay jamghatay main, chamakti thi kehkashan
aur zameen pay dhoondhta tha main apna ashiaan
na us ko hui chah… no mujhko mili wo raah
aur yeh sama dekhtay huay main khud bhee kho gaya…

Us nay kaha kay raatain hain… tou qurbat kioon nahee?
Menay hans kay taal dia… aur yoon baat khatam hui…

Friday, July 6, 2012

Teesra Musafir

Raat hay, main hoon aur woh
Pichlay pehr ka nasha
Ankhon main,
Ankhon main meri haan...

Kuch neend ka khumaar hay
Kuch aisa iztiraab bhee
Chaand bhee chupa chupa
Hay Badalon ka raaj bhee…

Surr hay, taal hay
Poocho na
Yeh gunah ka jaal hay
Poocho na
Hay raat ajnabi see…
Magar koi ajnabi nahee…


Chaand, na chandni hay, na woh
Tasveer hay udaas see
Haathon main,
Haathon main meri haan…

Mudhum see parchaiyan
Raqsaan hain deewaar par
Jo qarz tha ada hua
Ab bhool ja hisaab bhee...

Barbat hay, jaam hay
Dekho na
Har lafz intiqaam hay
Dekho na
Khunki hay jo hawa main
Kuch aur keh rahee hay yay…


Main hoon, tum ho, aur woh hay
In Tareek haywalon say
Jo ankhain tujhay dekhtee hain
Woh meri nahee…

Manzil

Idhar hay sochon ka azaab
Idhar hoon main
Idhar ulfat kay hain saraab
Idhar hoon main

Kioon hay zalim yeh asmaan?
Girti hain kaisi bijliyan?
Na hay yaqeen… na hay gumaan
Qaedi hain kioon sub yahan?

Yahan gharat ho sabr-o-qarar
Yahan hoon main
Sun lafzon ki yeh pukaar
Yahan hoon main

Yeh aas khilti hay kioon?
Phir Mitti main milti hay kioon?
Rukh badalti hay kioon?
Khwahish yeh barhti hay kioon?

Menay abhi kuch kaha tou nahi
Tum nay abhi kuch suna tou nahi

Idhar hota hay ihtisaab
Idhar hoon main
Idhar zukhm hain bay hisaab
Idhar hoon main

Idhar zinda hai tera naam
Idhar niklay gee meri jaan
Yaheen hay mera ikhtitaam
Idhar qissa hoga tamaam

Woh sub sawal, milain gay idhar
Behkay khayal, milain gay idhar
Mera lahoo bahay ga idhar
Mera junoon, rahay ga idhar

Kiyunkay tum bhee tou yaheen qaed ho...

Shehzadi

Mar miti hay jin naqoosh pay
Wo raazdaan teray nahi
Jo khauf ka mayaar hain
Ik rait ki deewaar hain…

Azal say hay yeh rooh qaid
Aur khwaabnaak hain yeh pal
Nami jo ankh main rehti hay
Meri simt jo behti hay

Luta denay ko yoon tou
hain kayee raaz bay qarar
Kitnay chaand hain sapno kay
Kitnay ghum k sitaray hain

Yoon thum na jati meri saans
Jo tu itni inayat say…
Mujhay rubaru bithati
Aur yeh raat bikhar jati…

Kay pyaasay dil bhee hain
Aur yeh pal bhee…
Yeh chaand bhee, chilman bhee
Yeh jaan-ba-lub qaatil bhee
Hain saagar-o-sahil bhee
Wo bhee hay aur tum bhee…

Yeh junoon pyaas ko uksaye ga
Nayee roshni phailaye ga
Teri aankhon main sama jaye ga
Tujhay rangon main lay ayega
Aur khud fana ho jayega…!

Monday, June 25, 2012

INTIHA - The Beginning


Dark eyes, bleak is the vision…
Black is the heart of my benediction
The mourning light she left behind…
Malice of choice, to speak her mind
O’ sleep, come home and put me down…
Been up too long in this fallen town...

No lament, no grin… The wages of sin…
In and out of a dream… somewhere in between…

A lurking spark that’s in her eyes
Kindling the fires deep inside
Standing beside, my lonely flame…
Naked, stark… ignited again
O’ sleep! O’ come… and take me down
Sweep me away from this fallen town…


Teri Chup main jo shor hay… 
Batla raha kuch aur hay 
Aa noch lay yeh perahan… 
Kay yeh bay hisi ka daur hay 
Yeh irtaash nayee soch ka… 
Nayee chahaton ki khoj ka 
Phir hum sukhan ho jaye… 
Ik nayee kasak jagaye!. 

Wohi rawish hay, wohi chaal hay… 
Bus usi raat ka malaal hay 
Naadim hay dil, baatil zabaan… 
Har sawal… ik jawaab hay 
Maskan mera gumnaam ho… 
Aur wajood ho gosha nasheen 
Tareekiaan hon jalwagar… 
Dum tor dey yeh roshni…!! 


This carousel is all I know…
Claiming my soul, gnawing my heart
Weary, amidst this circus… this life
I kneel, I break… I fall apart
O’ mirth, O’ come… and smite me down
Been a jester too long in this fallen town
A step below…. A notch above
Its vile, its bitter…. It’s you my love!
A savage lust they brood and they breed
In the name of desire… a sin indeed
Belching are their charming words
And yet you melt in their warmth… you’re deceived
To love is to lose your way…
Bringing you down… to this fallen town!


Koi devta ban betha… 
Tera khuda ban betha 
Phir talkh hui har khushi… 
Jo tu rehnuma ban betha 
Maazi ko lubhaatay raho… 
Naye zakhm lagatay raho 
Bastay ho meri ankhon main… 
Meri neendain uratay raho! 

Yeh jo bikhri hain ird gird… 
Beeti yaadon ki kirchian 
Yeh jo behtay hain teri simt… 
Teri zulfon kay aashna 
Jaan lay kay in ki ankhon main parastish 
Hay teray jism ki khaatir 
In kay honton pay tera naam… 
Mehez taskeen-e-hawas hay… 
Na pooch aay devi… yeh tujh say kia chahtay hain… 
Teri laghzish hay ibtida… yeh intiha chahtay hain… 
Woh intiha main hoon… 
Tera khuda main hoon!

Sunday, June 24, 2012

Haasil

Shukriya…
Shukriya tumhara
Main bhala… kesay ada karoon

Sun lia…
Shikwa tumhara
Ab kaho… kesi saza doon?


Kumla gaye,
Yaadon kay rung…
Teri hansi,
Mera kafan…
Dil kay soorakh
Banay raasta…
Gumrahiyon ki,
Amaajgaah…

Bund khirkiyaan,
Bekaar khoj…
Khushboo teri,
Aur meri soch…
Saansain teri,
Meri fiza…
Utarta nasha…
Hosh ka…


Tu hay mujh say munsalik
Main tujh main hoon dafan
Tu mujh main tou nahi
Main tujh main hoon dafan…

Saboot

Bharna chaho jo tum yeh shigaaf
Khurcho in Zakhmon ko aik baar
Choro qismat kay likhay ko tum
Meray seenay ko jala do aaj
Kar do raakh…

Menay kuch kaha tou nahi
Aisa kuch hua tou nahi
Phir bhee…
Bay-waja… kuch na tha

Kioon na pehlay mehka yeh suroor?
Jaantay ho tum apna qasoor
Poocho mujh say kia hay yeh majira
Hasraton main sulagti iltija

Menay kuch kaha tou nahi
Aisa kuch hua tou nahi
Phir bhee…
Koi tha… kuch na tha

Chehron Kay Paar

Khamooshi…
Kiyoon aisi…?

Simta nafrat main qaraar
Marzi khuda ki… dushmani main rachi…

Khamooshi…
Ho aisi…

Thora sakoon chahiyay
Khoya junoon chahiyay
Thori shikast thora malaal
Puri umeedon kay saath
Thora sitam chahiyay
Tera rehm chahiyay
Aag aur badan chahiyay
Saanson ki garmi, ubalti, dehkti, dozakh main jannat… chahiyay!

Yeh jisam ki hay pukaar
Kisi chamaktay sitaray ki tarhan
Tareekh say chimti
Aik uryiaan haqeeqat
Maut say humbistar…
Aur jab tum ho jaogay seraab… tou chamko gey tum bhi
Kisi aghosh ki zeenat ban kar…

Simta dua-on main aitibaar
Munn ki khalish… khuda ban gayee…


Hum hamesha hain
Hum hamesha thay
Hum hamesha say
Hum he hain


Thora sukoon chahiyay
Ankhon main khoon chahiyay
Thori si chahat ki pyaas
Thora sa sach thora qayas
Thora jabar, thora lahoo
Thora sa ‘kia’, thora sa ‘kioon’
Kuch darmayan… kuch dar-badar
Yoonhi garajti, bikharti, behekti khamooshi… chahiyay!

Saturday, June 16, 2012

Sajda

Aik din us makaan main
Basnay wala
Awazon ka aseer
Jhunjhula kar… girgira kar
Gira…

Ujalon say rooth kar
Chup chaap khayalon main
Naye deep jala kar
Apnay andheron ko ankhon main saja kar
Sar apnay kitnay hee ilzaam laga kar
Gira…

Gira, aur kho gaya…

Jo hua roshan nigahon ka andhera
Tou ahsaas ki tanhai nay
Khud ko akela na paya…
Sar utha kar… khauf chupa kar
Dekha kay…
Kafan posh kayee log kharay
Un kay honton pay taalay lagay
Chup chaap khayalon ki zubaan main
Apnay haathon ko uthaye huay
Ajab hisaar banaye huay
Ird gird kharay thay…

Phir goonji aik sadaa
Koi Soor phoonka gaya…
Aur gir gaye wo log…
Apni hee nazron main!

“Aay awaz kay aseer…
Kia poojtay ho khwaabon kay devta ko tum?
Kia jurm tumhara inhi logon ki tarha hay?
Kia tum bhee ho aag-o-tamanna say muztarib?
Taqdeer kay har mor ko kia kostay ho tum?”

Laraz gaye wo log…
Aur laraz uthi zameen…
Tauheed ki chitaa say
Chingaariaan ureen
  
Bola woh aseer:
“Na main tera mujrim hoon… na tu mera dushman
Na bughz say teray bhara hay mera daaman…
Main tou hoon bus ik saayaa…
Guzri zindagi ka
Aik murda admi ka…”

Ayee nidaa yeh phir, kay:
“Gustaakh teray lafz… hay baybaak teri soch
Kioon ghaafil hay naymaton say?
Kioon karta nahi shukar?
Jo jaanta hoon main… tu jaanta nahi…
Aadmi hay tu… koi khuda nahi...”

Bola aseer darr kay:
“Meray Maalik, meray gunah
Bay shumaar hain lekin…
Kia haq nahi insaan ka
Khwaabon ko taraashna?
Kia soch aur taskheer
Mera nahi shuaar?
Azmayen gay kab tak mujhay
Taqdeer kay sawaal?
Kab tak yeh umeedain meri
Muslehat ki aag ka
eendhan banain gee?
Justujoo meri hasti ki
Yunhi jalti rahay gee?”

Garja phir asmaan
Khashmageen saltanat…
Kafan poshon nay apnay haath
Zameen bos kar diyay…
Koondi phir bijliaan aur agaya jalaal
Kehnay lagay wo log yak-aawaz aik saath

“Hum saaz-e-Israfeel hain…
Humain jaltarang na jaan!
Hum hikmat kee riwayat hain…
Na kay jazbaat ka hejaan!”

Ayee Nidaa Falak say yeh:
“Aay muqaffal logo…
Jao tum ko amaan hay!
Yeh aseer hay yaadon ka
Is ki marzi kab yahan hay!
Is ki soch ka zindaan hay
Maqtal tumharay sach ka…
Uriyaan hay is kay qafas main
Tumharay noor ki devi!”

Phir gir gaye wo log…
Kafan phaar kay apnay
Aur utha aik shor naya…
Dharaktay dilon say!

“Hum hain tera husun…
Teri zindagi kay rung…
Na tu murda hay… na jaabir hay
Na apni soch pay qadir hay…
Chor runj ka daaman… bhula arzoo ki khoj
Naya jism kar talaash… nayee maut ki aghosh”

Bola Aseer apni nigahon ko jhuka kar
Un-dekhi hamaqaton ko gulzaar bana kar
“Hay qayam mera ahed
Aur shikasta mera eemaan
Meri zindagi kay rung…
Buht surkh ho chalay hain
Khwahish ka kaghaz…
Lahoo choos chuka hay!
Faraar… phir aik baar
Baykaar hee samjha…
Main apnay aap ko
Bus aik kirdaar he samjha!”

Haathon ko uthaye huay
Tehleel huay log…
Aur unkay honton kay wo taalay…
Toot chukay thay…

Hui larzaan phir zameen…
Aur chanay laga ghubaar
Ankhon kay andheron main
Hui gul phir chahat ki roshni…
Uthaya jo sar achanak
Tou badan bheeg chuka tha
Waqt ka dhaara…
Usi simt behnay laga tha…

Kesa kafan… kesa hisaar?
Yahan aur kuch na tha…
Nayee Awaazain
Shokh dilon ki… faaslon ki
farash say ubal pareen
Aur aseer un awazon ka…
Apnay labon ko see kar…
Ungliyaan ankhon main ghusa kar
Naye deep bujha kar…
Khwaabon kay andheron ko
aag laga kar
Dozakh bana kar…
Phir aik baar… Gir gaya!

Thursday, June 7, 2012

Sarfarosh


Kabhi zameen hoon, kabhi asmaan
Kabhi yaqeen hoon, kabhi gumaan
Kabhi ayaan hoon, kabhi nihaan hoon
Kabhi khushi hoon, kabhi fughaan

Yoon haqeeqat kay noor say
Hay roshan yeh kainaat
Hay gunahon kay ujalaon say
munawwar rah-e-nijaat

Sawal-e-zindagi ki goonj say
larzaan mera wajood
Na justujoo na parastish
Na koi abd na mabood

Isi khoj ko lekar barhayen gay yeh karvaan
Inhi zulmaat ki zad pay basayen gay ik jahan...

Kabhi fikar hoon, kabhi sabar
Kabhi idhar hoon, kabhi udhar
Hoon noha, hoon ghazal bhee
Main hayaat... main ajal bhee

Yoon haq o batil kay intishaar main
Hay muntashir jahan
Kamal-e-husn-e-saadgi main chupi
Sharr ki dastaan

Saakin lab-e-kausar
hain sadaqat ki hawaain
sawal-e-aab nahi yeh
hain yeh afat ki nidaain

Inhi maujon ki rawani main hay zindagi ka raaz
Isi sakoot main basa hay har sawal ka jawaab

Na main rehm hoon, na jafaa
Na main iblees, na khuda
Na taabay, na rahnuma
Hoon na moosa, na maseeha

Mehroom hay wafa say jo
Woh jaan nisaar hoon
Main sach ki aag hoon
Haq ka perokaar hoon
Meri soch na tanha…
Na tujh say baeed hay
Kay is inquilaab-e-waqt main
Tu bhee shareek hay

Har ahed main yeh baar-e-giraan hum uthain gay
Ik qadam tum barhao gay… ik qadam hum barhayen gay

Naseehat


Meray geeton main bastay ho
Kia khoob kartay ho
Naye rangon main sajtay ho
Kia khoob kartay ho

Baadalon, yoon na muon phero
Main tou bus phir hoon sawali
Afaton, mujh say na rootho
kay main ab dard say hoon aari

kabhi dekhay jo woh chehray
ghiray gardish ki baanhon main
laut ayee wohi chahat
liyay tuhmat nigahon main

ab bhee chehray badaltay ho?
Kia khoob kartay ho!

Nira ahmaq hoon main bhee tou
Hoon kitna main bhee deewana
Baharon, mujh say kia parda?
Main tou khud say hoon begana

Yeh pagal pan nahi logoun
Hay yay is rooh ka sarmaya
Saazishon ki dhoop main
hay yeh Junoon mera saya

mujhay pagal samajhtay ho?
Kia khoob kartay ho!

Qaatil


Yeh hay meri kaal nagri
Aur main hoon iska farishta…
Main khuld hoon sitam ki
Wehshat ka andhera hoon

Yeh kasak meri siyahi hay
Jo meri jabeen pay…
Hay aweezaan,
Usi tarah…
Jaisay tu nay sajayaee thi
Aur jabeen muskurai thi…

Main raqabat hoon
Main sadaqat hoon
Kayee naam hain meray
Khata-kaar, saza-war…
Budgumaan bhee hoon

Main raahi hoon weerano ka
Mehektay, khwaabeeda shabistano ka
Pur fareb insaano ka…
Jo meri ibadat ki hain mairaaj
Meray jazbon ka imtizaaj…
Sajda jinhain main nay
Kayee sadion tak kiya hay
Khoorooj-e-zeest diya hay

Shor hasti main meri
Dard o shikayat ka para hay
Haan yeh waar, is gunahgar kay
Haathon say hua hay…

Aur ab beh raha hay khoon…
Najanay kioon?

Zaaviay


Tum ney dekha
Kay buland haathon main
Hay girafta
Tumhara khwaab
Aur barh chalay tum
Bay awaaz aur baydharak… us taraf

Yeh kaisi razakari hay?
Qurbat ka wajd taari hay…
Kia alam-e-bedaari hay!

Us nay dekha
Kayee chehron main runga
Uska sakoon
Uski talaash
Aur jee utha wo yoon
Zindagee ki, bekhudi ki… chah main

Yeh qismaton kay raaz hain
Kin chahaton kay saaz hain?
Yeh rung-e-kainaat hain!

Main nay dekhi
Woh roshni jo kho betha tha
Jiskay dhokay main
Kayee zukhm sajaye thay
Aur kho chala main yoon
Arzoo kay, rung-o-boo kay… saraab main

Main jafa-on ka sawali tha
Woh jazbaat say khaali tha

Kis nay dekha?
Siyaah asmaan pay jhoolta
Woh chaand?
Jiski roshni
Is bay-dili ko
Ik saaya naya day gee…
Aur neend cheen lay gee…

Ronaq

Shaam rungeen
Pur-kaif ujalon main doobi
Nasheelay iradon main rachi…
Khushboo nazakaton ki
Rung layee hay…
Haan dekho… bahaar aye hay…

Ayeena muskura kar
Chamaktay aks say sharma gaya…
Aur muattar huin dil ki galiyaan
Milan ki sej pay kaliyaan…
Waadon ki khil rahi hain
Chund saa’atain mil rahi hain…

Ulfat ki ronamai hay
Qismat ki aqda-kushai hay…
Haan dekho… bahar aye hay…

Saanson ki hakoomat
Main naya walwala macha hay
Qurbat ka ghul bapa hay…
Raqsaan hay labon pay
Muskaan dheemi dheemi…
Nayee chahaton ki aseer
Naye chehron ki taskheer…

Pur-lutf, khwaabon si hay yeh shaam
Dhalti hay jo… dheeray dheeray
Simat-ti hay libaaday main raat kay
Teray husn ki poshaak ban kar
Dilnasheen, mahjabeen umangon ki
Mutarannum awaaz ban kar…

Sehmi sehmi…
Bheegi bheegi…
Madhosh sargoshiyaan hain
Chupi chupi si…
Hay palkon main sukh ki baaz gasht
Ik nashay ki kayfiat…
Jo tujhay suhani neend ki
Waadiyon main utaar kar
Teri jannat sanwaar kar
Kasak ka naag banay gee
Mujhay raat bhar dasay gee…