KHAUF

Khamoosh....

abhee tou andheray main

hay mehfooz mera aks

Shayad...

Kisi ki soch mujh tak

Bhee ja puhnchay

in bebaak sadaon main

hay kis ka fasana?

In rukti hawaon main

Kioon thehra hay zamana?

Bujhtay huay khwaab yoon meray chup hain

Hay kis ka intizaar... kioon andheray chup hain ?

Abhee...

Abhee tou raat baqi hay

Na maango abhee dua

Nahee...

Abhee tou nasha bhee

Toota nahee....

In behkay qadmon ko

Lejaaon main kahan?

In pyaasi nigahon say

Kia dekhoon yeh manzar?

Sehmay huay meray sab armaan chup hain

Aur kon hay yahan... jo raazdaan chup hain?

Kuch nahee hay yahan

Meray gunahon kay siwa

Meray murda sawalon ko

Dena na zindagi.... abhee nahee

Woh jo rehta hay khamoosh

Is baychain andheray main

Woh jiska darr hay mujhay

Jis ka rukh hay meray main

Woh bala... woh shaitaan

Woh zinda murda insaan

Main hee tou hoon.........!!!

Ghalti

Har qadam pay hain lafzon kay jaal
Ankhon main chupay hain janay kitnay khayal
Taptay hain… rukhsaar, teekhay hain hont
Chaata hay khumaar, aur khota hay hosh…

Main hoon… karb
Main hoon… aari

Aay mahlaqa, mujhay saanson main khonay de
Shola zubaan, bus yeh faisla honay de… abhee

Chupta nahi hay ab dil ka ghubaar
Is ghafil zehn pay hay koi sawaar
Wo munn ka… aaseb, wo qaatil mera
Rughbat ka shaitan… jo hay mujh main basa

Wo hay… dard
Aur wo hay… maazi
Wo hay… marz
Wo hay… haavi

Lazzat, zehr, maza, fareb
Sharm mita, aur khud ko baich
Hasrat, talab, rehm, jafa
Izzat ko khwahish ki bheent charha


Yoon bay dharak hay haathon ki pyaas
Girta badan say hay teray libaas
Larzaan hay… aghosh, dil main hay chor
Hoti hay khata, hain iraday kamzor

Aur main hoon haq
Aur main hoon haavi
Aur main hoon bund
Aur main hoon…
Mukar… Fikar… Sabar… Bashar…

Lazzat, zehr, maza, fareb
Sharm mita, aur khud ko baich
Hasrat, talab, rehm, jafa
Izzat ko khwahish ki bheent charha